നന്ദിയുണ്ട്

നന്ദിയുണ്ട് ... 

എന്നെ ഒരു കാമുകിയാക്കിയതിന്...

മാനം കാണാതെ സൂക്ഷിച്ച മയിൽപ്പീലിത്തുണ്ട് പോലെയുള്ള ഹൃദയത്തിന്

പ്രണയത്തിന്റെ വിശാലമായ ആകാശം

കാട്ടിത്തന്നതിന്...

വീണുപോകുമായിരുന്ന നിമിഷങ്ങളിലെല്ലാം മുറുകെ പിടിക്കാൻ

ഒരു കയ്യുണ്ടെന്ന വിശ്വാസം നൽകിയതിന്...

ഉള്ളിൽ താഴിട്ടുപൂട്ടിയ സ്വപ്‌നങ്ങൾക്ക്

ചിറകുകൾ മുളപ്പിച്ചതിന്...

മഞ്ചാടിമണികൾ പോലെ കരുതി വെച്ചിരുന്ന മോഹങ്ങൾക്ക് നിറം പകർന്നതിന്...

കണ്ണടയ്ക്കുമ്പോൾ നിന്നെ കാണാൻ കഴിയുന്ന

മായാജാലം പഠിപ്പിച്ചതിന്...

🌹 ❤ 🌹

പെയ്തൊഴിയുന്ന മഴയിൽ പോലും

പ്രണയത്തിന്റെ താളം ഉണ്ടെന്ന് പറഞ്ഞു തന്നതിന്...

മുടിത്തുമ്പിലെ തുളസിക്കതിരിനുപോലും

പ്രണയത്തിന്റെ വിശുദ്ധി പകർന്നു നൽകിയതിന്...

എന്റെ കണങ്കാലിലെ കൊലുസുകളെ പൊട്ടി ചിരിപ്പിച്ചതിന്...

കൈകളിലെ കുപ്പിവളകളെ പോലും കിണുങ്ങാൻ പഠിപ്പിച്ചതിന്...

നെറ്റിയിൽ നീ തന്ന ചുംബനത്തിൽ

സ്നേഹത്തിന്റെ നിഷ്കളങ്കത ചാലിച്ചതിന്...

നെറുകയിൽ നീ തൊട്ട കുങ്കുമചുവപ്പ് കൊണ്ടെന്റെ

കാത്തിരിപ്പ് സഫലമാക്കിയതിന്...

ഒരു നൂറുജന്മം ഈ നെഞ്ചിടിപ്പിന്റെ താരാട്ടിൽ

മയങ്ങാനുള്ള വരമേകിയതിന്...

പിന്നെ, ഓരോ ഹൃദയമിടിപ്പിന്റെ താളത്തിലും

നീയെന്റെ പുണ്യമാണെന്ന് ചൊല്ലിപറഞ്ഞത്...